Dir wärdet alli heimlech
dänke,
was wott itz ds`Chrüttermädi
Hüt?
Das passt doch mit sim
alte Chratte,
nid guet zu dene Hochzytslüt!
U was es eim eso weiss
z`brichte,
däm frage mir nid
viel dernah.
U mit syr Tee- und Chrütterruschtig,
da wüsse mir nid
viel a z`fah.
Ja, gueti Lüt, das
will nech gloube,
Dir gseht ja us wie Milch
u Bluet.
Doch chas nech emou ou
nid schade,
u isch zu allne Zyte
guet,
chli z`wüsse, was
me muess achere,
we eim halt doch de öppis
fählt.
We`s eim i allne Glider
guslet,
i Chopf u Hals u Mage
quält.
Kamille, das isch no nes
Mittel,
wo sälte schadt
u meischtens nützt.
U we mes z`rächter
Zyt awändet,
gwüss ou vor schwärem
Lyde schützt.
By Fieber u Ercheltigsschmärze,
isch Lindebluescht u
Münze guet.
Mi cha die Sach grad
useschwitze,
u fasset wider neue Muet.
Vo Veieli u Schlüssublüemli,
Zytröseli chasch
ou no näh,
das git bi Hueschte,
starchem Rüme,
e guete und e milde Tee.
Spitzwägerich, Wacholderbeeri,
Wullblüemli u Jsländisch
Moos,
syg bsunderbar by bösem
Hueschte,
es Mittel, billig u Famos.
Mit grosser Liebi due
nech nenne,
es vürnähms
u gar lieblechs Chrut.
Git feine Tee u süesse
Sirup.
S`isch Guldmelisse, liebi
Brut!
De d`Silbermänteli
us de Bärge,
isch öppis wo fasch
Wunder schafft.
Es hilft nach schwäre
Krankheitstage,
de Froue uf u git ne
Chraft.
D`Salbine isch ou nid
z`verachte,
zum Gurgle dient ihre
Tee.
u we de öpper nid
ma ässe,
so muess er öppis
Bitters näh.
Eh machet nume nid eso
ne Gränne,
dir düet ou nid
eso ab em Bier.
Und isch der Wärmuettee
ou bitter,
so hilft er äbe
doch, jo schier!
Wär Eisse het u bösi
Finger,
e Umlouf oder öppis
eso,
de gschwing zum Bade
für die Schmärze,
chli Chäslichrut,
das hilft nech scho.
Es putzt u heilet alli
Blätze,
nach paarne Tage gschpürsch
nüt meh.
U sött`s dr uf de
Niere fähle,
so mach e Kur mit Jbschetee.
I dänke, dir heit
nüt dergäge,
u sit de gwüss no
mängisch froh.
I schänke nech die
Chrütterpäckli,
Dir schetzit se de speter
scho.
I wünsche nech es
glücklichs Läbe,
Gott bhüeti nech
vor schwärem Leid.
E gueti Gsundheit,- und
dernäbe
wüsst Dir jtz mit
de Chrütter bscheid.